ما هو البيب PIP"" أو النقطة

ما هو البيب PIP"" أو النقطة

حركة سوق العملات تكون طفيفة جدا ... يعنى مثلا لا تتوقع إنك تلاقى الدولار اليوم ب 1 يورو وغدا تلاقيه ب 2 ... ولا حتى اليوم ب 1.5 وغدا ب 1.6 ... دى كلها فروق كبيره قوى بالنسبة لسوق العملات ... الفروقات بتكون أقل كتير من كده وهى بتكون عادة بقيمة 0.0001 من العملة يعنى وحدة من 10000 من العملة فى الغالب. وده اللى بيسمى البيب PIP يعنى لو إشتريت زوج EUR/USD بسعر 1.6040 وبعدين بعته بسعر 1.6050 يبقى إنت بكده حققت مكسب 10 بيب وهو الفرق بين السعرين. ودائما أى مكسب أو خسارة فى السوق بيقاس بالبيب PIP وكمان قيمة Spread التى سبق تعريفها فى هذا الدرس تقاس بالبيب أيضا. يعنى نقدر نقول مثلا إن قيمة Spread لزوج العملات EUR/USD هى تقريبا 3 بيب PIP. وهى بالتالى تعتبر تكلفة أى عملية على هذا الزوج ... يعنى لو مش حتقدر تحقق مكسب أعلى من قيمة Spread دى اللى هى 3 بيب يبقى متفتح العملية هذا.

البيب PIP أيضا يعتبر أقل قيمة من العملة ممكن التعامل معها (بس فيه حاليا بعض الوسطاء ممكن يتعاملوا مع عشر البيب).

طريقة حساب قيمة البيب:

طبعا إحنا قولنا إن أقل حركة لسعر العملة أو السوق بتكون بكسر صغير جدا من العملة بنسميه البيب. وبالتالى أى إرتفاع فى سعر العملة بالبيب أو إنخفاض يقابله على طول مكسب وخسارة على أى عملية أنا فاتحها وده على حسب أى عمله بعتها وأى عمله إشتريتها.

وبالتالى مهم جدا إنى أعرف ما هى قيمة هذا المكسب أو الخسارة اللى ححصل عليه فى مقابل هذا البيب.

الحقيقة قيمة البيب بتختلف من زوج لأخر من العملات. سبق وقولنا إن سعر البيع والشراء اللى بيكون مصاحب لأى زوج من العملات بيكون الثمن اللى حدفعه من العملة الثانية علشان أشترى العملة الأولى أو الثمن اللى حاخده من العملة الثانية مقابل بيع العملة الأولى. وبالتالى فإن قيمة البيب تكون محسوبة بكسر من العملة الثانية. يعنى مثلا زوج العملات EUR/USD تكون البيب فيه محسوبة بالعملة الثانية وبالتالى فإن واحد بيب فى هذا الزوج تساوى 0.0001 من اليورو وفى زوج العملات USD/CHF تكون قيمة البيب 0.0001 من الفرنك السويسرى فى الزوج EUR/GBP تكون قيمة البيب 0.0001 من الجنيه الإسترلينى.

طيب نيجى لنقطه تانيه مهمه جدا وهى عند شراء أو بيع زوج من العملات حشترى منه قد إيه أو أبيع قد ايه ؟؟ هل حشترى من زوج العملات EUR/GBP مثلا 4 ... ده معنا إن لما السوق يتحرك بحيث إن سعر الزوج ده يزيد بمقدار 20 بيب إنى كسبت 20 بيب مطروح منه قيمة Spread اللى ممكن فى هذا الزوج يكون فى حدود 5 بيب ... يعنى أنا كسبت 15 بيب ... طيب دول يطلعوا كام ؟؟؟ تعالوا نحسبها ... الزوج ده البيب فيه بتساوى 0.0001 من الجنيه الإسترلينى وده معناه إنى كسبت 4 * 15 * 0.0001 = 0.0060 من الجنيه الإسترلينى ودى طبعا قيمه صغيرة جدا جدا جدا ... ما تستاهلش تعبى أساسا. الحقيقة إن عمليات البيع والشراء بتتم بكميات أكبر كتي من 4 ... يعنى مثلا 100 ألف أو مليون من العملة. يعنى مثلا لو حققنا نفس الربح السابق وأنا كنت شارى 10 ألاف من نفس الزوج EUR/GBP والسوق تحرك بمقدار 15 بيب ... علشان نحسب كسبنا كام يبقى حنضرب 10000 * 15 * 0.0001 = 15 جنيه إسترلينى وطبعا ده يستاهل شويه ... طيب لو كنت شارى 100 ألف ... حيكون المكسب 150 جنيه إسترلينى ... لو كنت شارى مليون حيكون المكسب 1500 جنيه إسترلينى.

طبعا فيه نقطتين مهمين جدا هنا:

1- النقطه الأولى أكيد بتدور فى دماغكم كلكم دلوقتى ... وهى ازاى حشترى مليون يورو ... هل لازم يكون معايا ملايين الدولارات علشان أدخل سوق الفوريكس ؟؟ والإجابة لأ طبعا وده بيتحل عن طريق حاجه اسمها المتاجره بالهامش ... حنتكلم عليها بعد كده.

2- النقطه التانيه إنك زى ما ممكن تكسب 150 جنيه إسترلينى ... لو السعر تحرك 15 بيب فى الإتجاه التانى حتخسر برضه 150 جنيه إسترلينى. وبالتالى فكلما زاد حجم التعامل زاد المكسب أو زادت الخسارة ... وبالتالى فهى مخاطرة.